Lau pertsonarentzako osagaiak:
400 g pasta fresko
Kuia txiki bat
250 g txanpinoi
Ziazerba sorta bat
Bi baratxuri ale
Bi tomate heldu
Oliba olioa
Gatza
Piper hauts beltza
Parmegiano gazta
Aurreko atalean, pasta freskoa etxean nola egin ikasi genuen. Orain, pasta hori oinarri hartuta plater goxo bat prestatuko dugu.
• Lehenik, kuia txiki bat garbitu, eta puska txikietan moztu. Gauza bera egin txanpinoi eta baratxuriekin ere. Zartagin zabal batean oliba olio zorrotada bat jarri, eta beroa dagoenean, baratxuria bota; eta, segidan, kuia txiki eta txanpinoi pusketak. Su bizian hiru bat minutuz erregosi.
• Bitarte horretan, tomateak zuritu eta haziak kendu. Ondoren, puska txikitan moztu, eta jarraian zartaginera gehitu. Ziazerba garbitu, eta zartaginera bota. Gatza bota, eta piper beltz hautsa ere bai. Guztia nahastu, eta sua moteldu. Hamar bat minutuz su motelean mantendu.
• Espagetiak egosteko, lapiko handi bat urez bete, eta gatz dezente gehitu. Su bizian berotzen jarri, eta irakiten hastean, espagetiak gehitu. Jarraian, sardexka baten laguntzaz, espagetiei buelta pare bat eman, elkarrekin itsats ez daitezen. Bi minutu nahikoa izango dira pasta egosteko. Beraz, berehala atera, eta ura ongi kendu.
• Espagetiak plateretan banatu, eta zartaginean prestatu dugun barazki nahaskia, koilara baten laguntzaz, espagetien gainean jarri. Bukatzeko, parmegiano gazta gainetik xehatu, eta oliba olio zorrotada batez busti.
