Elikadura. Errezeta

Barazki krepeak

JUAN CARLOS RUIZ / ARGAZKI PRESS

Iker Markinez -

2014ko otsailak 1
OSAGAIAK

Krepeak egiteko:

3 arrautza.

100 gramo irin.

40 gramo gurin.

Gatza.

Litro laurden bat esne.

Barazkiak

Porru bat.

Tipulina.

Ziazerba sorta bat.

200 gramo txanpinoi.

Pikillo piper pote bat.

Oliba olioa.

Gatza.

Basokada bat esne gain.

Krepeak prestatzeko, ontzi batean osagai hauek nahastuko ditugu: arrautzak osorik, gatz pitin bat eta irina. Dena ongi irabiatu. Ondoren, esnea gehitu eta nahastu.

Zartagin ertain batean gurin pusketa bat jarri, eta berotzen ipini. Gurina urtzean, krepearen masara gehitu, eta zartagina berriro sutan jarri. Krepearen masa berriro ongi nahastu, eta krepeak egiten hasiko gara. Burruntzali txiki baten laguntzaz, zartaginera bota krepearen masa. Alde batetik bestera zartagina mugitu, guztia ongi zabaldu arte. Segundo gutxi batzuen ondoren, buelta eman krepeari eskuen laguntzaz, eta, jarraian, plater batera atera. Gainontzeko masarekin, pauso berberei jarraitu, masa guztia bukatu arte.

Barazkiak prestatzeko, guztiak garbitu eta moztu. Lehenik, porrua eta tipulina. Bi osagai horiek zartagin zabal batean jarri, oliba olio zorrotada batekin eta gatz pitin batekin. Hogei bat minutuz erregosi, eta erretilu zabal batera atera.

Zartagin berean, xafletan moztutako txanpinoiak gorritu pare bat minutuz. Horiek ere erretilura atera. Ziazerbari oliba olio zorrotada bat bota, eta zartaginera gehitu beste pare bat minutuz, su bizian. Erretiluan gorde.

Azkenik, pikillo piperrak ere zartaginera bota, eta oliba olio zorrotada txiki bat bota. Hamar bat minutuz goxatu su ertainean. Horiek ere erretilura atera. Kontuan hartu erretiluan barazkiak elkarrekin nahastu gabe uzten badituzue ondoren, krepeak betetzeko garaian, lana txukunago egingo duzuela.

Zartaginean basokada bat esne gain gehitu, eta irakiten jarri su motelean. Bost minutu igaro eta gero, sutik kendu.

Krepeak betetzeko, barazki sorta bakoitzetik koilarakada bat jarri krepearen izkina batean, eta pikillo piperrak gainean. Hala, krepe guztiak bete arte. Ondoren, krepea tolestu.

Barazki gehiago sobratzen bazaizkigu, esne gainarekin gehitu. Esne gain hori erabili krepeak gainetik bustitzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna