Elikadura. Errezeta

Arroza txipiroiekin

JUAN CARLOS RUIZ / ARGAZKI PRESS

Iker Markinez -

2013ko maiatzak 11
OSAGAIAK

4 pertsonarentzako osagaiak:

1 kg Begi handi.

2 tipula.

Kazokada bete tomate saltsa.

Kopa bete ardo zuri.

Baratxuri buru bat.

400 gr arroz.

Gatza.

Oliba-olioa.

Zuritu tipulak, eta zatitu puska handietan. Aletu baratxuri burua, zuritu, eta osorik utzi.

Ipini lapiko bat sutan, oliba-olio zorrotada batekin, eta gehitu prestatu ditugun barazkiak. Horiek erregosten ditugun bitartean —20 bat minutuan, gutxi gorabehera—, garbitu begi handiak, eta moztu pusketatan. Horien tinta geroago erabiliko dugu.

Barazkiak ongi erregosiak daudenean, gehitu kopa bat ardo zuri, eta irakin bost bat minutuan. Jarraian, gehitu tomate saltsa. Guztia ongi nahastu, gehitu litro bat ur, eta bota gatz pitin bat.

Irakiten hastean, gehitu tinta poltsa, aurretik gordea dugun horixe. Guztiak 15 minutuan irakin duenean, pasatu dena txino batetik, eta ipini lapiko batean. Jarri begi handi pusketak, eta irakin beste 40 bat minutuan, su motelean. Behar izanez gero, gehitu ur pixka bat.

Xehatu bi baratxuri ale, eta ipini beste lapiko batean. Gehitu oliba-olio zorrotada bat, eta jarri sutan; baratxuriak dantzan hastean, gehitu arroza. Frijitu, minutu pare batean, arroza eta baratxuriak.

Azkenik, gehitu ura, baina arrozaren kantitate berdinean. 6—7 minutu pasatu ondoren, arrozak ia ur guztia xurgatuko du.

Orduan, gehitu beste ontzian prestaturiko txipiroiak, saltsa eta guzti, eta irakiten utzi, guztira 20 minutu pasatu arte. Eta gero zerbitzatu, eta kito.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna