Iker Markinezek bakailaoa oinarri hartuta prestatu du aste honetako errezeta.
Bakailao kokotxa gezatuak, kilo bat Piper gorria Piper berdea Tipulak, 2 Baratxuri aleak, 5 Etxeko tomate saltsa, kazo bat Piper txorizeroak, 2 Oliba olioa Kaiena piperra Gatza
Gaurkoan, errezeten artean klasikoetako bat denarekin gatozkizue. Oso ezaguna da, askotan entzun izan dugulako izena, baina, beharbada, askotan ez dugu hain argi izaten zehazki zer den edo zertan datzan. Nire kasuan, gaztea nintzela, Mikel Bermejo sukaldariaren liburu bateko errezetako pausoei jarraituta prestatu nuen bakailaoa lehen aldiz club ranero modura.
Bi zati nabarmen ditu errezeta honek. Lehenik eta behin, piperrada bat prestatuko dugu. Nahiz eta errezeta honetan barazki jakin batzuk erabili, beste batzuk ere erabil ditzakegu, eta hozkailuan ditugunak aprobetxatu. Barazki guztiak garbitu, karratuetan moztu, eta kozinatzen hasiko gara. Horretarako, moztutako barazkien artetik tipula eta baratxuri erdiak erregosi, oliba olioarekin eta gatz pitin batekin. Hamar minutu pasatu ondoren, piper gorri eta berdeak gehitu.
Orduan, sua pixka bat bizitu, eta beste hamabost bat minutuz erregosi. Ondoren, sua moteldu, eta tomate saltsa gehitu. Azkenik, piper txorizeroak bota. Bi aukera daude pauso horretarako. Dendan erositako piper txorizero mamiaren koilarakada bat botatzea, edo, nik egin dudan bezala, guk prestatutakoa erabiltzea. Horretarako, bezperan, piper txorizero lehorra uretan beratzen jarri, eta, hurrengo egunean, mamia atera eta mami horixe bera erabili errezetarako. Beraz, piper txorizeroa bota, eta guztia ondo erregosten utzi, su motelean, zartagineko barazki guztiak ahalik eta lehorren gelditu arte.
Bakailao kokotxak prestatzeko, lapiko batean oliba olio txorrotada bat bota, eta sobran gelditutako baratxuri aleak gehitu, baita kaiena piper puska bat ere. Momentu horretan —lehenago ez—, sutan jarri lapikoa, baratxuriek kolore gehiegi har ez dezaten. Sutan jarri bezain laster, baratxuriak dantzan hasiko dira, eta, gorritu aurretik, sutatik atera eta bakailao kokotxak zartaginean jarri, azala gora begira dutela.
Sua moteldu, eta bost minutuz mantendu erregosten. Ondoren, itzali eta tapa jarri. Behin epeldu direnean, tapa kendu, eta lapikoari eragin, mugimendu borobilak eginez eta eskuekin bultza eginez. Horrela, modu errazean lortuko dugu pil-pil ederra, kokotxek askatu duten gelatinak eta olioak lagunduta. Guztia sutan berotzen jarri berriz ere; piperradaren lapikoa ere berotzen jarri.
Aurkezpenerako, kokotxak platerean jarri, pil-pilarekin, eta piperradarekin banan-banan busti. Hain zuzen ere, nahasketa horri deitzen zaio club ranero.
Ea gustatzen zaizuen.
Agur bat, eta festa politak izan ditzazuela!
