Legatza oinarritzat hartuta prestatu du Iker Markinez sukaldariak aste honetako errezeta.
OSAGAIAK LAU LAGUNENTZAT
Legatza 800 gr. (lau pusketa) Kuia txikia (1) Tipula (1) Baratxuri freskoa (2) Gatza Oliba olioa Ezpeletako piper hautsa
Lehenik, barazkiak prestatzen hasiko gara. Horretarako, tipula zuritu eta juliana moduan moztu. Lapiko batean gatz pitin batekin eta oliba olioarekin erregosten jarriko dugu. Bitartean, kuia txikia lehenik xaflatan eta ondoren tiratan moztu. Eta tipulak hamar bat minutu erregosten daramatzanean, kuia txikia gehitu. Beste 10-15 bat minutuz su ertainean erregosi.
Legatza prestatzeko, xerra bakoitza bi zatitan moztu, gero errazago kozinatzeko. Lehenik, plater batean jarri eta gatz pixka bat bota, eta solomo bakoitza oliba olioarekin pixka bat busti.
Zartagin bat sutan jarri, su ertainean, oliorik gabe, eta ongi-ongi berotu, plantxa baten moduan. Berotzean, legatz pusketak zartaginean jarri. Minutu batez eduki, baina, adi, arrainik ukitu gabe. Horrela, plantxaren efektua ongi egiten utziko diogu, eta legatz xaflei «zarakar» moduko bat aterako zaie. Ondoren, zatiei buelta eman, eta, orain bai, olio txorrotada bat gehitu. Beste pare bat minutuz frijitu eta erretilu batera atera.
Zartagin berberean, baratxuri fresko tirak erregosi, pare bat minutuz.
Azkenik, barazkiak plater baten erdian jarri, pare bat legatz zati barazkien gainean jarri, eta baratxuri freskoa legatz pusken gainean. Plateraren bueltan, ezpeletako piper hauts pixka bat zabalduko dugu, eta oliba olio gordin tanta batzuk ere bai.
