Bi hilabete pasatxo iraun duen greba baten ondoren, astelehenean dira lanera itzultzekoak Tubos Reunidosen Amurrioko fabrikako langile gehienak. Goizean batzarra egin dute lantegian, eta lanuztera deitu zuen organoak, langile batzordeak, protesta amaitzea erabaki duela jakinarazi die langileei. Ez da bozketarik izan, nahiz eta langile batzuek hala egitea eskatu duten.
Sindikatuetako ordezkariek argudiatu dutenez, enpresa hartzekodunen konkurtsoan sartu izanak egoera aldatu du eta horregatik hartu dute lanera itzultzeko erabakia. «Borroka beste fase berri batean sartu da», azaldu du enpresa batzordeko ordezkari batek. Hori bai, ohartarazi du berriro lanuzteak «aktibatzeko» prest daudela, egoerak hala eskatzen badie.
ELAk, LABek eta ESKk deitu dute gaurko batzarra, haien botoekin eutsi baitio enpresa batzordeak greba mugagabeari. ESK greba jarraitzearen alde zegoen (bi ordezkari ditu), baina ELAk (zortzi) eta LABek (lau) uste zuten eteteko ordua iritsi zela, eta haien iritzia nagusitu da.
Bi sindikatu horiek aldarrikatu dute greba «baliogarria» izan dela, haren bitartez lortu baitute 301 langile kaleratzeko enplegu erregulazioa bertan behera geratzea eta altzairutegiaren itxiera eta logistikaren kanporaketa eragoztea.
Gaineratu dutenez, hurrengo asteetan erakunde publikoen gaineko presioa handitzen saiatuko dira, uste baitute Eusko Jaurlaritzak eta Arabako Foru Aldundiak irtenbidearen parte izan behar dutela.
Aurreko batzarra
Asteartean dagoeneko itzuli ziren lanera Tubos Reunidosen langile batzuk. Aurreko ostegunean, langile batzordearen onespenik gabe, lantegian bertan batzarra egin zuten langileak ziren. Batzar horretan 234 lagunek hartu zuten parte, eta horietatik 232k egin zuten greba uztearen alde. Piketean zeuden lankideen txalo ironikoen eta txistuen artean sartu ziren batzarrera, eta grebalariek jarritako alfonbra gorri bat igaro ondoren. Bulegoetako langileak izan ziren lanera itzuli zirenetako asko, baina ekoizpen lerroetako batzuk ere baziren.
Batzar horrek CCOOren eta UGTren babesa jaso zuen, baina grebari buruz erabakitzeko legitimotasuna kendu zion enpresa batzordearen gehiengoak, ELAk, LABek eta ESKk osatutakoa.
Zorra ezin ordaindu
263 milioi euroren zorra du Tubos Reunidosek, horietatik 150 milioi SEPI Espainiako Gobernuaren menpeko erakundearekin, eta zor horri aurre egiteko ezintasunak eraman du zuzendaritza konkurtsoa eskatzera. Asteartean, Gasteizko epaitegi batek ontzat hartu zuen enpresaren eskaera eta PKFAttest Concursalen esku utzi zuen konkurtsoaren administrazioa.
Aiaraldea-k jakinarazi duenez, konkurtsoaren administratzaileak maiatzaren 26an bilera batera deitu ditu zuzendaritza eta langileen ordezkariak, bere asmoen berri emateko. Haren esku dago orain enpresaren kudeaketa, eta bi bide nagusi ditu: Tubos Reunidos bere gain hartuko duen inbertitzaile bat aurkitzea (Balenciagarekin egin zuen bezala) edo enpresa likidatzea eta lortutako diruarekin zorraren ahalik eta zatirik handiena ordaintzea (Navalen egin zuena).
Tubos Reunidoseko zuzendaritzak ohartarazi die langileei enpresa ixteko arriskua benetakoa dela, eta inor ez dagoela prest enpresari maileguak emateko, diru hori galtzeko beldur direlako.
Sindikatuek, beren aldetik, auzitan jarri dituzte enpresaren azken urteetako emaitzak, uste baitute zuzendaritzak galerak puztu egin zituela.
Ikusi gehiago
Aldi berean, behin eta berriro salatu dute zorraren zati bat enpresaren akziodunek eragin zutela, enpresa une hobeagoan zegoenean zorpetu egin zirelako haien artean irabazi handiagoak banatzeko. Horregatik, orain enpresa salbatzeko dirua haiek jarri beharko luketela argudiatu dute.
