Eusko Jaurlaritzako Segurtasun sailburu Bingen Zupiriak eman du datua: 50 lagun baino gehiago ditu ikerketapean Ertzaintzak Munduko Kopako finalaren harira Hego Euskal Herrian egondako istiluengatik. Espainiak Argentinaren aurka jokatu zuen partida hura, duela bi aste, eta Euskal Herriko futbol selekzioaren ofizialtasunaren aldeko manifestazioak antolatu zituzten Hego Euskal Herriko hainbat txokotan. Bada, horietako zenbaitetan istiluak izan ziren. Horiek zirela eta Ertzaintzak bost lagun atxilotu ditu jada. Zupiriak egun hartako jazoerak gaitzetsi ditu Euskadi Irratiko Faktoria saioan egin dioten elkarrizketan: «Batek baino gehiagok epailearen aurrean erantzun beharko du, egindako lege hausteak larriak baitira».
Azken egunetan oihartzun handia izan du Espainiako Poliziak Bizkaian egin dituen operazioak; zeinetan bi lagun atxilotu zituzten. Horrek Ertzaintzaren eskumenekin talka egin zezakeela adierazi dute zenbait adituk. Polemika horren inguruan galdetuta eman du Zupiriak atxilotuen datua. Bere ustez Polizia eskuduntzena ez da jomugan jarri behar dena; baizik eta finalaren egunean izandako «jazoera larriak». Izan ere, segurtasun sailburuak gogor egin du istiluetan parte hartu zutenen aurka. Adierazi duenez, «sakonean kezkatzen» duena da «zenbait arlotan indarkeriaren erabileraren askatasuna» normalizatu izana.
«Egun batean faxistak dira, beste egun batean Israelen alde daudenak, eta beste batean oligarkiaren eta inperialismoaren alde omen daudenak. Eta orain espainolismoaren aurkako bandera hau hartu dute. Jarrera horiek onartezinak dira», azpimarratu du. Nabarmendu du, hala ere, «minoritarioak» direla Araba, Bizkai eta Gipuzkoako gizartean, «zorionez». Baina kezkaturik agertu da, «hor» baitaude.
Informazioa lantzen ari gara.
