Irailean bortxatua izan ondoren Angelun (Lapurdi) bere buruaz beste egindako emakumearen kasua «erailketa matxistatzat» hartu du Itaiak, eta bortxa hori kalean gaitzestera deitu du gaur arratsalderako. Hego Euskal Herriko hiriburuetan egingo ditu elkarretaratzeak: 19:00etan izango dira Bilbon (Areatzan), Iruñean (San Frantzisko plazan) eta Gasteizen (Farol Handian); eta 19:30ean izango da Donostian (Bulebarrean).
Sutan talde transfeministak atzo salatu zuenez, 19 urteko emakume gazte batek bere buruaz beste egin zuen irailean, Angeluko bere etxean, egun batzuk lehenago Baionan bortxaketa bat jasan eta salatu ondoren. Itaia Emakumeen Antolakunde Sozialistarentzat ere «erailketa matxista bat» izan da, eta ohartarazi du andreen aurkako bortizkeria «larriagotu» egin dela, Ipar Euskal Herrian berriki salatu duenez.
Era berean, ideia matxisten eta erreakzionarioen hedapenaz ohartarazi du: «Emakumeen aurkako diskurtsoak eta jarrerak normalizatzen ditu, eta erasoak legitimatzeko testuingurua sortzen du». Hori dela eta, «matxismoaren aurkako posizioa zabaltzera» deitu du Itaiak, bai diskurtso erreakzionarioei aurre eginez, bai erasoak jasandako emakumeak babestuz.
