Joan de martxoan Imanol Pradales Eusko Jaurlaritzako lehendakariak eta Pedro Sanchez Espainiako gobernuburuak segurtasunaren arloan adostutako konpromisoak berretsi egin dituzte gaur Bingen Zupiria Segurtasun sailburuak eta Fernando Grande-Marlaska Barne ministroak. Bi aldeak telematikoki bildu dira goizean Segurtasun Batzordean —segurtasun gaietarako aldebiko koordinaziorako organoa da—, eta, besteak beste, itundu dute arma zurien erabilera debekatzea, delitu errepikatzaileen kasuetarako araudia aldatzea eta Ertzaintzak atzerritarrak kanporatzeko prozesuetan parte hartzea.
Bilera hori uztailean bi gobernuen arteko aldebiko batzordea elkartzeko baldintzetako bat zen, hain justu ere. Lehendakariaren nahia baitzen bi agintariek hitzez adostutakoa paperean berrestea, eta martxan jartzea. Bilera hori egingo den oraindik airean dago, ordea. Akordioak urrun jarraitzen baitu oraindik Gernikako Estatutua osatzeko falta diren eskumenei dagokienez. Edonola ere, Espainiako Gobernuak urrats bat egin du gaur Eusko Jaurlaritzaren eskakizunetako bati erantzunda.
Pozik agertu da Zupiria bera ere bilerak emandakoarekin. Azpimarratu du akordioak Ertzaintzari parte hartze «eraginkorragoa eta handiagoa» emango diola «estrategikoa» bilakatu den segurtasunaren alorrean, eta konpromisoek herritarren kezkei erantzungo diela: «Ertzaintzak polizia integral gisa duen posizioa indartuta geratu da, eta horrek berez ekarri behar du euskal herritarrek segurtasun pertzepzioa handiagoa izatea».
Bederatzi dira lortu diren akordioak, eta nagusietako bat da atzerritarrak kanporatzeko prozesuei buruzkoa. Espainiako Poliziarena da eskumen hori, baina aurrerantzean Ertzaintzak ere «zeresana» izango du. Ez du esku hartuko, ordea; parte hartuko du soilik kanporatzeko prozeduretan eman beharreko segurtasun eta ordena publikoaren arloko polizia txostenetan.
«Helburua da delituak egiten dituzten atzerritar jatorriko pertsonak kanporatzeko Espainiako Poliziak egiten dituen txostenetan Ertzaintzak biltzen duen informazioa ere jasotzea»
BINGEN ZUPIRIA Segurtasun sailburua
Batez ere, «segurtasuneko, ordena publikoko edo terrorismo» kasuetan, Zupiriaren hitzetan. «Helburua da delituak egiten dituzten atzerritar jatorriko pertsonak kanporatzeko Espainiako Poliziak egiten dituen txostenetan Ertzaintzak biltzen duen informazioa ere jasotzea». Izan ere, sailburuak azpimarratu du Ertzaintza dela sarri lehen eskuko informazioa duena.
Arma zuriak eta droneak
Beste aldaketa nagusietako bat arma zurien ingurukoa da. Debekatu egin nahi da «ia modu orokor batean» kalean arma zuriak eta bestelako objektu arriskutsuak eramatea edo erabiltzea, eta horretarako armen erregelamendua aldatzea adostu dute bi aldeek. Era berean, arma zuriekin lotutako arau hausteen Erregistro Zentrala sortzea era hitzartu dute. Horrek aukera emango dio Ertzaintzari Espainiako gaizkileen inguruko informazioa eskuragarriago izateko.
Baita delitu bera behin eta berriro egiten dutenen aurkako erantzuna «hobetzeko» ere. Horri lotuta, Prozedura Kriminalaren Legea aldatzea itundu dute. Baina armen erregelamenduarekin ez bezala —Moncloaren eskumenekoa da—, lege aldaketa horrek Diputatuen Kongresuaren oniritzia jaso beharko du, eta ikusteko dago gehiengoak hori babestuko ote duen. Nolanahi ere, Justizia Ministerioa arduratuko da aldaketa sustatzeaz, Zupiriak aditzera eman duenez.
Dronei buruzko arau aldaketak egitea ere adostu dute, Segurtasun Sailak izan dezan beren beregi horien inguruko kontrola. Ertzaintzak Europako datu baseetarako sarbidea izatea ere hitzartu dute, baita segurtasun pribatuaren eta zibersergutasunaren arloetan gaitasun gehiago izatea ere. Bi aldeen borondatea da aldaketak sei hilabeteko epean egitea: «Badakit epeek estutu egiten dutela. Badakit planteatu ditugun aldaketak asko direla, eta lan asko eskatzen dutela. Baina gure borondatea da lan hori egitea eta ezarritako epeen barruan bete ahal izatea».
Segurtasun Batzordea ere sei hilabete barru bilduko da, adostutakoaren jarraipena egiteko. Edozein kasutan, bi aldeen elkarlanerako eta akordiorako borondatea nabarmendu du sailburuak.
