Ohi bezala, Jaizkibel konpainia parekideak parte hartu du Hondarribiko alardean. Jaizkibelen desfilea beti izaten da berezia, baina aurten zirraragarriagoa izan da: izan ere, aurten 30 urte bete dira emakume talde bat lehen aldiz desfilean sartzen saiatu zenetik. Emakume aitzindari haiei gorazarre egin die jaizkibelek, eta haietako zenbaitek bat egin dute desfilearekin, Gaur 30 urtez borrokan, emakumeok alardean leloa idatzita zuen pankarta bat eskuetan.
Jantzi diferenteak eraman dituzte soinean Jaizkibeleko kide batzuek. Aurten nahi duten konpainiaren uniformearekin desfilatzeko aukera izan dute, haien aldarri nagusia gogora ekartzeko, hau da, emakumeek edozein konpainiatan ateratzeko eskubidea dutela.
Ohi bezala, kantinera etxean jasota abiatu du goizeko desfilea konpainia parekideak, eta Gernikako Arbola zelaiditik irten da Kale Nagusirantz. Konpainia baztertzaileek toki horretan elkartzea dute tradizio, baina ez dira agertu, Jaizkibelekin bat ez egiteko; beraz, parekideek hartu dute berdegunea. Nora Ferreira kapitainak gidatuta, Kale Nagusian barrena joan dira, txalo artean. Han, omenaldia egin diete duela 30 urteko 26 emakume aitzindariei, eta haietako zenbait konpainia aurretik paratu dira, euren borroka aldarrikatzen zuen pankarta batekin.
Zirrara handiko uneak izan dira Kale Nagusian eta Arma plazan bizi izandakoak. Irrintziak bota dituzte balkoi batetik, «Emakumeak alardean» oihuak hartu du plaza osoa, eta txaloak, besarkadak eta malkoak nagusitu dira.
