Euskal Herriko Torturatuen Sareak agerraldia egin du gaur Donostian, eta ohartarazi torturarena «oraindik itxi gabe dagoen zauri sakona» dela Euskal Herrian. Raul Fuentes Villotaren eta Mikel Zabalzaren kasuak jarri ditu adibiderako, gogorarazi baitu biak ala biak duela urte asko gertatu izanagatik ere oraindik «bizi-bizirik» daudela. Bada, inpunitatea amaitu eta tortura kasu guztiak ikertu daitezela eskatu dute.
Torturatuen Sareak babestu egin du Fuentesek jasandako torturei buruzko auzia berriz zabaltzeko berriki egindako eskaria. Aurrez Iratxe Sorzabali eta Pello Alcantarillari adierazi moduan, elkartasuna adierazi diote Fuentesi ere. Azaldu dute haren kasua lagungarria izango dela torturaren «aitortza kolektiboaren aldeko borrokan» egia, justizia eta erreparaziorako bide berriak irekitzeko. «Zurekin gaude, eta espero dugu bide hori baliagarria izatea Espainiako Estatuaren hainbat aparatuk tortura politikoaren aplikazioan izan duten erantzukizuna estaltzeko eraikitako inpunitatearen harresia arrakalatzeko», adierazi dute torturatuen sareko kideek.
Hain zuzen ere, azpimarratu dute inpunitate horren «adibide lazgarrienetako bat» dela Mikel Zabalzaren kasua. Inork ez baitu ukatzen Guardia Zibilak Donostiako Intxaurrondo auzoan duen kuartelean jasandako torturengatik hil zela Zabalza. Aste honetan berrogei urte bete dira hura desagertu eta Bidasoa ibaian hilda agertu zenetik. Bada, Torturatuen Sareak gogorarazi du, Hego Euskal Herriko erakundeetan estatuaren biktima gisa aitortua bada ere, oraindik ez dela azaleratu zehazki zer gertatu zen: «Galdera horiek ofizialki erantzuteke daude oraindik, berrogei urte igaro eta gero, eta uste dugu badela ordua erantzukizun publikoak hartzeko ere».
Agerraldia baliatu dute, halaber, abenduaren 14an Donostiara joateko deia egiteko. Egun horretan Donostiara itzuliko baita Zabalzaren heriotzaren 40. urteurrena gogoratzeko erakusketa ibiltaria. Donostiako autobus batean jarri dute, 1985ean lankideek haren desagerpena salatzeko erabili zuten pankarta eta guzti. «Gidaria ez dago hemen, non dago?», zioen lankideek autobusetik zintzilik udaletxeraino eraman zuten pankartak. Orduko protesta gogora ekartzeko eta Zabalzaren kasua argitu dadin eskatzeko, harrera egingo diote autobusari, 12:30ean, Donostiako Bulebarrean.
