Ertzainak Borrokan plataforma sortuz geroztiko lehen hauteskunde sindikalak egin dituzte Ertzaintzan, eta Euspel sindikatua nagusitu da, Eusko Jaurlaritzarekin lan hitzarmena sinatu ez zuen sindikatu nagusiena. Hitzarmen horren kontra zeuden ertzainen haserrea kapitalizatu du horrenbestez Euspelek.
ERNE sindikatuak irabazi izan ditu azken bi hamarkadetan hauteskunde sindikalak Ertzaintzan, baina hirugarren lekura amildu da azken bozetan. Esanek hartu du indarra, eta bigarren geratu da. 7.000 polizia inguruk izan dute botoa emateko eskubidea.
Euspelek emandako datuen arabera, 1.732 boto lortu ditu; Esanek, 1.665; ERNEk, 1.280; Sipek, 354; ELAk, 214; eta Ekosek, 160.
ELAk lau ordezkari sindikal zituen lehen, eta batekin geratuko da. Ohar bidez azaldu duenez, klase sindikatu bakarra izaten segituko du Ertzaintzan, eta abertzalea den bakarra ere bai. Polizien lan baldintzak hobetzeko lanetan segitzeaz gain, honako ideia indartu nahi dute: «Ertzainak herritarren zerbitzu publikorako langileak dira», eta «herritarren gertuko» polizia eredu baten aldeko lanean segituko dutela gehitu dute.
Pandemiaren ostean gaiztotu zen giroa Ertzaintzan, eta 2023an sortu zen Ertzainak Borrokan plataforma, sindikatuez besteko taldea. ERNE, Esan eta SIPEren negoziatzeko modua salatu zuen, eta ertzain batzuen artean zegoen ezinegon hori Euspelek bildu du. Konfrontaziorako joera izan du Eusko Jaurlaritzaren Segurtasun Sailarekin.
