Iker Arana auzian ikerketapean dagoen ertzainaren defentsak auzia artxibatzeko eskatuko du. Iazko apirilaren 4an, Bilboko Errekalde auzoko Etxarri II gaztetxea husteko operazioan, Arana auzokidea larri zauritu zuen Ertzaintzak botatako foam jaurtigai batek, eta barrabil bat galdu zuen. Istiluen kontrako polizia horren defentsak, baina, ukatu egin du lesio horiek jaurtigaiak eragin izana, tiro egin zuen distantzia handia zelakoan.
Jose Antonio Bitos da ertzainaren abokatua. Hura Euspeleko ordezkaria da, eta Falangeren kontrako protesten harira martxan den auzibidean akusazio gisa ere ari da. Hark ostiralean lekuko gisa deklaratu zuten bi ertzainen hitzak kontuan hartzea nahi du auzia ixteko. EuropaPressen arabera, horiek adierazi zuten «ezinezkoa» dela SIR jaurtigai batek halako kaltea eragitea tiroa egin zuen distantzia kontuan hartuta. Ertzaintzaren txostenaren arabera, 33,89 metroko distantziara jaurti zuen foam pilota ikerketapean dagoen agenteak.
Ertzaintzak bi jaurtigai mota ditu: SIR eta SIR-X. Bilboko kasuan, agenteak SIR jaurtigai bat bota zuen Aranaren kontra. Bien artetik, horiek dira distantzia laburragoetarako baliatzen dituztenak, kalte txikiagoak eragiten dituztelako. Halere, arriskutsuak dira horiek ere: Tecnalia enpresak Segurtasun Sailarentzat egindako txosten baten arabera, 15 metro baino gertuagotik jaurtiz gero, burezurreko haustura ere eragin dezakete.
Era berean, abokatuak argudio gisa baliatu du Arana ez zela zuzenean ospitalera joan, ordu batzuk geroago baizik. Eusko Jaurlaritzako Segurtasun sailburu Bingen Zupiriak Eusko Legebiltzarrean adierazi zuenez, baina, tiroa jaso eta gero barrabiletako minez alde egin zuen Aranak lekutik, eta goizaldean jo zuen larrialdietara; urgentziazko ebakuntza bat egin zioten. Sailburuak esandakoaren arabera, Arana besoak goian zituela gerturatu zen ertzainengana, han zirenei tiro egin izanaz kexu, eta jarraian ikertutako agenteak beste tiro bat bota zion. Hala, Zupiriak sinesgarritasuna eman zion Aranak egindako salaketari, eta hala esan zuen Eusko Legebiltzarrean: «Litekeena da ertzain batek desegoki jokatu izana».
Oztopoak ikerketan
Aranak salatu zuen ertzainak, aurrez aurre zuela, «barrabiletara apuntatu» eta tiro egin ziola. «Ertzainak begiratu zidan, makurtu zen eta zuzenean barrabiletara apuntatu zidan», adierazi zion BERRIAri. Hala berretsi zuen Aranak epailearen aurrean ere, abenduaren 11n. Bertaratutako dozenaka lagunen babesa izan zuen orduan, eta horiek Poliziaren inpunitateari aurre egin beharra nabarmendu zuten. Egun berean, baina, ikertutako poliziak ere deklaratu zuen, eta bestelako bertsio bat eman zuen. Poliziaren defentsak Aranaren jarrera jarri nahi izan zuen jomugan, esanez polizia lerroa gainditu zuela eskuan botila bat zuela. Argudio horri heldu zion esanez «molotov koktelak prestatzen» ari ziren gazteak ere ikusi zituztela poliziek gertakari horren aurretik.
Bilboko Laugarren Instrukzio Epaitegian ari dira auzia ikertzen. Bidea, baina, ez da erraza izan, Aranak aitortu zuenez. Hura kexu da Ertzaintzak izandako jarrerarekin. Batetik, agenteek halako operazioetan eramaten dituzten gorputzeko kameretatik ez zen irudi baliagarririk lortu; denera, 35 kamera zeuden. Bestetik, Aranak berak eta haren ingurukoek lortu behar izan zituzten jazotakoaren inguruko argazki eta bideoak, inguruko bizilagunei galdetuta. Hain zuzen, horiek ahalbidetu zuten tiro egin zion ertzaina identifikatzea, uztailerako.
