Otsailaren 6an heldu zen berria, mobilizazio aldi luze baten ostean: jakin zen bertan behera geratu zela Araba, Bizkai eta Gipuzkoako ikastetxe erlijiosoetako langileen greba. Izan ere, aurreakordio bat lortu zuten ELA, Steilas, CCOO eta UGT sindikatuek Kristau Eskola eta IZEA patronalekin. Besteak beste, %16ko soldata igoera adostu zuten. LAB sindikatuak ere bat egingo du itun horrekin; gaur jakinarazi du, prentsa ohar baten bidez. Zehaztu du, hala ere, «baiezko kritikoa» izango dela.
Aurreakordioaren gaineko dudak otsailaren 6an bertan utzi zituen agerian LABek. Kritikarako motibo nagusia, hauxe: itunak ez du jasotzen soldatak sektore publikoko langileenekin parekatzea. LABek iragarri zuen militanteei egingo ziela kontsulta erabakia hartu baino lehen. Eta egin dute hautua: akordioa sinatuko dute. Baina argi utzi dute: «borrokan» jarraitu behar da soldatak parekatzearen alde, eta 2027rako lortu behar da, gainera, helburu hori.
Nabarmendu du hitzartu den akordioan «enplegua mantentzeko» eta «lan zamak» arintzeko neurriak daudela eta horrek bultzatuta emango duela baiezkoa.
