PSOEko Antolakuntza idazkari ohi Santos Cerdani lotutako ustezko ustelkeria kasuaren harira, Neniques Roldanek eskaera bat egin zion Begoña Alfarori, ekainean: sozialistekin zuen harremana hautsi zezala, eta Nafarroako Gobernutik atera zedila —Alfaro Zurekin-en ordezkari bakarra da gobernuan—. Bada, eskaera hori berretsi du gaur Nafarroako Ahal Dugu-ko koordinatzaile nagusiak, iritzita koalizio gobernuak PSN hauspotu besterik ez duela egiten, ezkerreko politikak bazter utzita.
Roldanek ekainean hartu zuen Nafarroako Ahal Dugu-ren lema, eta jakinarazi du bere taldea jada bildu dela Zurekin Nafarroa koalizioa osatzen duten alderdietako ordezkariekin. Joan den astean bildu ziren koalizioko batzorde exekutiboarekin, eta aurrez aurre adierazi zieten zer iritzi duten koalizioak Nafarroako Gobernuan izan beharko lukeen ordezkaritzari buruz. «Gure hausnarketa da gobernutik atera behar duela, bertan egotea koartada ezin hobea baita PSOErentzat, gobernua ezkerrekoa dela esateko; eta badakigu gobernuaren politikak ez direla ezkerrekoak, guztiz neoliberalak baizik», adierazi du prentsa agerraldi batean.
Roldanek azpimarratu du Ahal Dugu-ren buruzagitza berritu bada ere alderdiaren barruan ez dela «ezer hautsi»; aitzitik, adierazi du besterik gabe «bestelako iritzia» duela alderdiak foru gobernuan izan beharko lukeen ordezkaritzari buruz. Eta zehaztu du Ahal Dugu-ko parlamentari Daniel Lopez ere bat datorrela zuzendaritzaren iritziarekin.
Hiruko ituna
Cerdan auziari buruzko ikerketa batzorde parlamentarioa hizpide hartuta, Roldanek esan du Zurekin-ek «ahots propioa» duela, eta ez duela jardungo beste alderdiek zer esango edo egingo duten kontuan hartuta. Gogor egin du gobernu bazkideen kontra, eta EH Bilduri, Gero Bairi eta PSNri egotzi die elkarrekin jardutea; izan ere, ez du ulertzen zergatik Nafarroako lehendakariak ez duen batzordera joan beharko.
«Kirrinka egiten du lehendakariak amaieraraino iritsiko dela esan eta gero atzera egiteak. Horrek argi uzten du EH Bilduren, Geroa Bairen eta PSNren artean nolabaiteko hirukoa osatu dutela», adierazi du Roldanek, eta erantsi du Iruñeko Erorien Monumentua eraisteari buruzko eztabaidan ere islatzen dela hiruko indar hori. «Hori da gelako elefantea, eta horri buruz hitz egin behar da. Horretarako sortu dute hirukoa».
Ahal Dugu-ko koordinatzaile nagusiak gaurko agerraldia baliatu du, halaber, iragartzeko alderdiak bi ekinaldi jarriko dituela martxan. Batetik, burokraziaren aurkako bulego bat zabalduko dute Iruñeko egoitzan, administrazioarekin edo zerbitzuak ematen dituzten enpresekin egin beharreko tramiteak errazteko. Eta, bestetik, Ikasgela Soziala ere jarriko dute martxan, eztabaidak eta formakuntza sustatzeko militanteen eta herritarren artean.
