Nobelaren eta prosa poetikoaren arteko tartean hor nonbait koka litekeen lan batek eskuratu du 2026ko Euskarazko Literaturaren Euskadi saria: Ixiar Rozasek idatzitako Narrugorrik liburuak. Epaimahaiko kideek «literaturan esplorazio lana» egitea, hizkuntzaren bidez adierazteko «modu berriak bilatzea» eta literatura generoen artean mugitzeko gaitasuna izatea nabarmendu dizkiote idazleari, eta besteak beste hala argudiatu dute zergatik jaso duen aitortza lanak. Are, saiakera, egunerokoa eta poesia uztartzen ditu Narrugorrik liburuak; zenbait urtez landutako testuen bilduma bat da.
Ikusi gehiago
Euskadi sarietako beste bi aitortzaren irabazleen berri ere eman dute gaur, gainera. Yolanda Arrietaren Zurtz lanari eman diote Haur eta Gazte Literaturaren Euskadi saria, eta Kike Ibañezen El diablo sobre ruedas-ek jaso du saria ilustrazioaren alorrean. Besteak beste, umezurztasun kontzeptuari emandako «esanahi zabal eta iradokitzailea» nabarmendu du epaimahaiak Arrietaren lanean, bai eta egituraren aberastasuna ere; «poliedrikoa» dela azalduta, zehazki. Bestalde, El diablo sobre ruedas lanerako Ibañezek eginiko ilustrazioen kalitate artistikoa goraipatu dute, batik bat.
Donostiako Tabakaleran egiten ari dira prentsaurrekoa, eta bertan dira, sarituez gain, Andoni Iturbe Kultura sailburuordea eta Ana Lopez Kultura sustatzeko zuzendaria. Saritu bakoitzak 14.000 euroko ordainsaria jasoko du, eta 4.000 euro gehiago jasoko dituzte euren lanak beste hizkuntza batera itzultzen badira.
