Iragarrita zegoena gertatu da. Ez da izan uztail amaieran bezainbestekoa, baina gaur ere ehunka izan dira Marokotik Ceutara igarotzen ahalegindu diren migratzaileak. Aldi hartan ez bezala, ordea, Rabatek geldiarazi egin ditu migratzaileak Fnideq kanpoaldean -Castillejos, gazteleraz- eta dozenaka atxilotu ditu.
Saharaz hegoaldeko herrialdeetakoak dira gaur muga igarotzen ahalegin direnetatik gehienak, nahiz eta bertako iturrien arabera, adingabe marokoarrak ere baziren tartean. Marokok, beste krisialdi bat saiheste aldera, ehunka polizia bidaliak zituen Ceutarekin duen mugara, baita txarrantxaz osatuta hesi bat eraiki ere lehengoaren aldamenean. Ondorioz, migratzaileek ez dute aukerarik izan Ceutatik gertuen dagoen Marokoko hirian sartzeko ere.
Goizaldean hasi dira poliziak migratzaileen aurka egiten, helikopteroen laguntzaz. Dozenaka lagun atxilotu dituzte eta autobusetara igo. Atxilotuak mugatik 800 kilometrora eraman dituzte, mugatik urrun.
Sare sozialetatik egin dute oraingoan ere deia. Han azken egunetan Marokotik Espainiarako muga zeharkatzeko mezuak zabaldu dituzte, eta hori dela eta agintariek mugetako segutasuna zorroztu dute bi aldeetan.
Uztail amaieran 80.000 migratzailek zeharkatu zuten muga eta haietatik 8.000 inguruk jarraitzen dute bertan. Gehienak kalean daude, bizilagunek eskainitako laguntzaren menpe. Espainiako Gobernuak iragarri du guztiak itzularaziko dituela.
