4 pertsonarentzako osagaiak:
Kilo eta erdi patata berri
Kilo erdi ilar
Bi tipulin berri
Bi baratxuri ale
400 gr txirla
Perrexila
Gatza
Oliba olio birjina
• Ilarrak aletu, eta garbituta gorde erretilu batean. Ahalegindu ilar ale txikiak lortzen, finagoak gelditzen baitira.
• Patatak zuritu, garbitu eta laban baten laguntzaz koskatu, zati oso txikiak egin gabe. Horiek ere gorde.
• Bi tipulinak zuritu, eta zati txikitan moztu. Lapiko handi batean, oliba olio txorrotada batekin batera tipulin zatiak gorritzen jarri.
• Hamar bat minutu pasa ondoren, bi baratxuri aleak xehetuta gehitu, eta, segidan, gorde ditugun patatak bota.
• Ongi nahastu ondoren, ura gehitu patatak estali arte. Gatza bota, eta irakiten utzi ordu laurden batez.
• Ondoren, ilarrak gehitu, eta beste hogei bat minutuz egosten eduki.
• Denbora hori pasatzean, txirlak gehitu lapikora, aurrez ondo garbituta. Kontuan eduki kalitateko txirlak behar ditugula. Txirlak, beraz, azken momentuan gehituko ditugu; izan ere, bi minutuan irekiko dira.
• Bukatzeko eta mahaira atera aurretik, perrexil xehetua gehitu. • Oso ongi gelditzen da, sua itzaltzean oliba olio gordin txorrotada bat botata, zapore ederra ematen baitio.