Ertzaintzaren esku da jada aste honetako Azpeitiko (Gipuzkoa) ustezko hiltzailea. Eusko Jaurlaritzako Segurtasun Sailak jakinarazi duenez, bere burua aurkeztu du Ondarroako (Bizkaia) polizia etxean. Goizeko 05:30ean aurkeztu da, eta su arma bat entregatu du. Atxilotu egin dute, astearte iluntzean taxi gidari bat hiltzea leporatuta. 43 urte ditu.
Hilketa asteartean 20:15ean gertatu zen. Ustezko hiltzaileak autoarekin jo zuen taxi bat, eta taxilaria autotik jaitsi zenean tirokatu egin zuen. Tokian bertan hil zen 31 urteko gizona, eta tiratzaileak ihes egin zuen. Gauean haren autoa aurkitu zuten Azpeitiko beste toki batean.
Harrezkero haren bila aritu da Ertzaintza. Hilketa gertatu eta berehala, kontrolak jarri zituen inguruetan. Ertzaintzaren unitate bereziko agenteak Azpeitiko etxebizitza batera eta lokal batera sartu ziren miaketa egitera. Azkoitian (Gipuzkoa), berriz, Estrada kalean izan ziren, eta herritik kanpo ere aritu ziren bila.
Ustezko erasotzailea Azpeitiko Landeta auzoan bizi da, eta haren etxea gertutik zaindu dute, baina Ertzaintzak ez du lortu hura aurkitzea. Azpeitiko saltokiei zaintza kameren grabaketak eskatu dizkie, tiratzailea non zebilen jakiteko.
Aste honetan beste tiroketa bat izan Barakaldon (Bizkaia), ostegun iluntzean, eta horren usteko egilea ere polizia etxean da, hilketa izan eta ordu batzuk geroago Amurrion (Araba) atxilotu zutenetik.
