Dana Erlich Israelek Espainian duen enbaxadako misioburua hitzaldia ematekoa zen Bilbon, datorren astean. Baina ez du halakorik egingo azkenean; antolatzaileek bertan behera utzi dute, protestak direla medio. Izan ere, ekitaldiak harrabotsa eragin du, bereziki sare sozialetan, eta bertan behera uzteko eskatu dute hainbat alderdi politikok, elkartek eta norbanakok. Hitzaldia El Sitio elkarteak antolatu zuen, Israelen ikuspegi orokorra eskualdeko testuinguruan izenburupean.
Bilboko Palestinarekin Elkartasuna taldeak, esaterako, elkarretaratzera deitua zuen hitzaldiaren egunerako, hilaren 17rako. «Probokaziotzat» jo dute ekitaldia, eta haren aurkako protesta egitera deitu zieten herritarrei. Silken Indautxu Bilbao hotelean antolatua zuten bilkura, hitzaldia egitekoa zen tokian, 18:30ean.
🔴 Datorren asteazkenean espainiar estatuko 𝐈𝐬𝐫𝐚𝐞𝐥𝐠𝐨 𝐞𝐧𝐛𝐚𝐱𝐚𝐝𝐨𝐫𝐞𝐚 Bilbon izango da.
— Palestinarekin Elkartasuna (@Palestinarekin) September 11, 2025
Mobiliza gaitezen sionisten eta bere konplizeen aurrean.
📅 Irailak 17
🕒 18:30
📍Silken Indautxu Hotela
SIONISTAK, EZ HEMEN EZ INON!
ISRAEL DESEGIN! pic.twitter.com/gmqUVNqxiO
Bilboko EH Bilduk ere kritikatu du hitzaldia antolatu izana, eta salatu du «onartezina» dela Bilboko Udalaren irudia erabiltzea «genozidioa zuritzeko» ekitaldi bat iragartzeko. Erantsi du neurriak hartzeko eskatu diola udalari. Izan ere, Bilboko Udalaren logoa ageri da elkarteak zabaldu duen gonbidapenean.
Juan Mari Aburto Bilboko alkateak sare sozialen bidez erantzun du. Alkateak ukatu egin du udalak hitzaldia babestu duela, eta adierazi du antolatzaileei eskaria bidaltzekoak zirela udalaren logoa kendu eta ekitaldia bertan behera uzteko. Aburtok argitu duenez, Bilboko Udalak diruz laguntzen dituen elkarte eta talde askok erabiltzen dute udalaren logoa euren ekitaldien berri emateko.
