Iker Aranaren auzia ikertzen ari den epaileari auzibidea ez ixteko arrazoiak eman dizkio Justizia Aranarentzat plataformak, edo behinik behin, hala uste dute plataforma horretako kideek; izan ere, Bilboko Etxarri II gaztetxea husteko operazioan, Ertzaintzaren foam jaurtigai baten ondorioz barrabil bat galdu zuen gazteak foam hori nola jaso zuen erakutsten duen bideo bat argitaratu du plataformak. Ertzaintzaren abokatuak eskatu berri du auzia artxibatzeko, eta bideo horrekin ikerketa aurrera jarraiaratzea espero dute Aranaren aldeko plataformako kideek.
Justizia Aranarentzat plataformak «egun hartan benetan gertatu zena» azaltzen duen bideoa zabaldu duela jakinarazi du. «Ikerri tiro egin zion ertzainaren ondoan zeuden bi ertzainen deklarazioen arabera, ez da posible foam bala batekin distantzia hartatik jota Ikerrek barrabil bat galdu izana». Deklarazio horietan oinarriturik eskatu dute artxiboa, plataformak gogorarazi duenez. Horrez gain, ertzain horiek adierazi zutenez, Aranak segurtasun-lerroa gainditu zuen, eta hark zein Gaztetxe aurrean zeuden beste zenbait pertsonek kristalezko botilak jaurti zizkieten ertzainei.
Bada, plataformak, zabaldutako bideoarekin batera, azaldu du Gaztetxearen aurrean «egoera lasai» zegoela, Ertzaintzak «lehen tiro bat» bota zuela, eta zenbaitek, tartean Aranak, jarrera hori aurpegiratu zietela ertzainei. Plataformak dio Arana «metro batzuk hurbildu» zela «besoak altxatuz protesta gisa», eta ertzainek esan dutenaren kontra, ez zuela botilarik jaurti, «ezta segurtasun-lerroa gainditu ere».
Zuzenean barrabiletara
Momentu hartan, ertzain batek berriz ere tiro egin zuen, Aranaren aldeko taldearen arabera, «oraingoan zuzenean Ikerren
barrabiletara». «Beraz, barrabilaren apurketa, gau hartan bertan, Basurtuko ospitalean egindako mediku-txostenean baieztatu zen bezala, Ertzaintzak jaurtitako foam bala batek eragin zuen», ziurtatu du Justizia Aranarentzat plataformak. Aranak berak ere argi azaldu zuen nola gertatu zen guztia BERRIAri emandako elkarrizketa batean.
«Barrabilaren apurketa, gau hartan bertan, Basurtuko ospitalean egindako mediku-txostenean baieztatu zen bezala, Ertzaintzak jaurtitako foam bala batek eragin zuen»
JUSTIZIA ARANARENTZAT PLATAFORMA
Epaileari artxiboa eskatu dion abokatua da Euspel sindikatu polizialaren abokatu nagusia. Plataformak azaldu du «Euspelek Ertzaintzaren barruko sektore erreakzionarioena» ordezkatzen duela; abokatu hori akusazio partikular gisa dago Gasteizen Falangeari aurre egin zioten antifaxisten auzian eta, gainera, Etxarri gaztetxearen operazioan ustez bi gazte jipoitzeagatik ikertuak izaten ari diren beste bi ertzainen abokatua ere bada.
Deklaratu duten ertzainek adierazi zuten «ezinezkoa» dela SIR jaurtigai batek halako kaltea eragitea tiroa egin zuen distantzia kontuan hartuta. Ertzaintzaren txostenaren arabera, 33,89 metroko distantziara jaurti zuen foam pilota ikerketapean dagoen agenteak. Ertzaintzak bi jaurtigai mota ditu: SIR eta SIR-X. Bilboko kasuan, agenteak SIR jaurtigai bat bota zuen Aranaren kontra. Bien artetik, horiek dira distantzia laburragoetarako baliatzen dituztenak, kalte txikiagoak eragiten dituztelako. Halere, arriskutsuak dira horiek ere: Tecnalia enpresak Segurtasun Sailarentzat egindako txosten baten arabera, 15 metro baino gertuagotik jaurtiz gero, burezurreko haustura ere eragin dezakete.
Hori horrela, eta foam tiroaren inguruko bideoa kaleratu ondoren, plataformak «erantzukizun guztiak» argitu daitezen exijitu du, Aranaren auzia zigorrik gabe ez geratzeko. Plataformak uste du «poliziaren inpunitateari aurre egin eta protestarako eskubidea bermatu egin behar direla».
