Tirabira eta itzulinguru frankoren ostean, 2016-2017 urteetako Osakidetzako oposizioetako filtrazioen auzia epaitegietan erabakiko da, azkenik. Urte hasieran zegoen aurreikusita pauso hori, epaiketa aurreko saioarekin. Epaiketa fasera iritsi aurreko saioa da hori, baina bertan behera geratu zen. Gerora jakin zenez, auzia epaitu behar zuten hiru jujeek parte hartzeari uko egin ziotelako jazo zen hori, epaiketaren aurreko faseetan parte hartu zutela argudiatuta.
Epaimahai berria izendatu ostean, gaur izan da epaiketa aurreko saioa. Fiskaltzak «posible» ikusten zuen bi aldeek, akusazioak eta defentsak, akordioren bat lortzea. Hori jazoz gero, auzia ez zitekeen epaiketara iritsiko. Alta, saio horretan bi aldeek ez dute akordiorik erdietsi, eta, hortaz, urriaren 20an eta 21ean epaiketaren saioak egingo dira Arabako Probintzia Auzitegian.
Bi akusatu soilik
Epaiketara iritsiko dena, ordea, jatorrizko auziaren txatal bat baino ez da izango. ESK eta LABek bultzaturiko akusazio partikularrak hemeretzi pertsona salatu zituen, baina horietako hamazazpiren aurkako eginbideak artxibatu zituen epaitegiak. Jatorrizko akusatuetako baino bi ez dira geratzen auzian, beraz.
Donostia ospitaleko mediku bat eta oposiziogile bat dira akusatuak. Oposiziogilea medikuaren semearen bikotekidea zen oposizioak egin ziren garaian. Fiskaltzaren arabera, medikuak emakumeari kirurgia plastikoko espezialitateko probako galderak filtratu zizkion, eta horri esker atera zuen hain emaitza ona oposiziogileak. Ustezko filtrazio hori dela eta, Fiskaltzak bi urteko kartzela zigorra eskatzen du medikuarentzat; urtebetekoa, berriz, oposiziogilearentzat.
Lekuko gehienak, epaiketatik at
ESK eta LABek bultzaturiko akusazio partikularrak lekuko ugariren parte hartzea eskatzen zuen epaiketa horretan. Epaimahaiak, ordea, ez ditu onartu horietako gehienak, "jada epaituriko auziei dagozkielako, eta ez oraingoari", artxibaturiko hamazazpi akusatuen auziei erreferentzia eginez. Horrenbestez, ez dute epailearen aurretik pasa beharko Jon Darponek, garaiko Osasun sailburuak; Rebeka Ubera legebiltzarkideak; ezta Kepa Urigoitiak, medikuen sindikatuko buruak, ere.
Bost oposiziogileren agerraldia ere eskatu zuten LABek eta ESKk, baina bakarraren lekukotza onartu dute epaileek, aipaturiko arrazoiengatik. Aitzitik, lekuko gisa agertuko dira kirurgia plastikoko probako epaimahaiko kideak, presidentea, idazkaria eta eledunak, alegia, proba konkretu horretan parte hartu baitzuen auziperatuta dagoen oposiziogileak.
