Agerraldia egin du goizean Aizpea Otaegi Errenteriako alkateak, Xenpelar bertso eskolarekin eta Kukai dantza taldearekin lotutako erasoen auzian azalpenak emateko. Lehenik eta behin, Otaegik zehaztu du biktimak babestea eta haien borondatea errespetatzea izan duela udalak lehentasun une oro, eta horri lotuta hartu dituztela erabakiak.
Otaegiren esanetan, Xenpelar bertso eskolaren kasuan, maiatzean izan zuen udalak gertatutakoaren berri, biktimek mugimendu feministara eta Bertsozale Elkartera jo zutenean. Udalak berehala hartu zituen neurriak, eta eskolaren jarduna eten zuen. Auzia adin txikikoen fiskaltzak hartu du bere gain eta ikerketa abiatu du.
Bestelakoa izan da Kukai dantza taldeko Jon Maia Seinen kasua. Otaegik azaldu duenez, mugimendu feministarekin hitzartuta eta biktimek hala eskatuta, prozesu bat jarri zen martxan, dantzariak egozten zitzaiona aitortu eta zuzendari kargua utzi ostean. Hain zuzen ere, Maia Seinek urrats hori egin zuelako erabaki zuen udalak 2025ean dantza taldeari diru laguntza ematea —salaketen berri 2024an izan zuten—.
Iazko urtearen amaieran, ordea, Kukai dantza taldeak jakinarazi zion udalari Maia Sein bere lanera itzuliko zela otsailean. Hori jakinda eta informazio zabalagoa jaso bitartean harremanak etetea erabaki zuen udalak, eta hala jarraitzen du oraindik.
Hala, udal gobernuaren kontra egin diren kritikei erantzun die Otaegik: «Jo dezagun bi auzi hauen muinean zaindu behar den horretara: biktimak eta haien nahia. Guztion interes partikular askotarikoak sobran daude, oposizioarenak barne. Eta sobran daude ez diotelako batere onurarik egiten biktimen erreparazio prozesuari, ezta indarkeria matxistaren aurkako borrokari ere».
