Bingen Zupiria Eusko Jaurlaritzako Segurtasun sailburuak Ertzaintzak Loiuko (Bizkaia) aireportuan egin zuen esku hartzea zuritu zuen herenegun, Eusko Legebiltzarreko Segurtasun Batzordean: adierazi zuen istiluak agenteen kontrako «erasoen» ondorioz hasi zirela. Global Sumud Euskal Herriarentzat «onartezina» da «poliziaren neurriz kanpoko hedatzeak sortutako egoeraren erantzukizuna herritarrei leporatzen saiatzea». Tentsioa ertzainak egoteak eta ertzainen jarrerak sortu zutela salatu dute: «Ertzaintza da gure kideen kontrako eraso bortitz, neurrigabe eta nahita egindakoaren erantzule bakarra».
Global Sumud Euskal Herriak bi eskaera egin ditu: alde batetik, Zupiriak dimisioa eman dezala «berehala»; bestetik, Eusko Jaurlaritzak eten ditzala Israelekin dituen harreman eta kontratu guztiak. Oharra kaleratu du Zupiriak Eusko Legebiltzarrean esandakoei erantzuteko. Ukatu egin du Loiuko aireportura joandakoek Ertzaintza probokatu zutenik eta ertzainen kontrako erasorik egin zutenik: «Hala erakusten dute irudiek».
Ikusi gehiago
Euskal Herriko sei ekintzailek parte hartu zuten Global Sumud Flotillaren maiatzeko ekintzan: itsasoz Palestinara iristen saiatu ziren. Israelgo armadak, baina, nazioarteko uretan atxilotu zituen. Tratu txarrak eman zizkien ekintzaileei. Euskal Herriko bi partaide Turkiako ospitaleetan artatu behar izan zituzten. Sei ekintzaileak larunbatean iritsi ziren Loiuko aireportura. Senideek, lagunek eta Palestinaren aldeko herritarrek harrera egin zieten. Ertzainak zeuden ongietorrian, eta sei ekintzaileei oldartu egin zitzaizkien. Borraz jo zituzten. Lau pertsona atxilotu zituzten, bi ekintzaile eta ongietorrira joandako bi pertsona. Atxilotuei «desobedientzia larria, erresistentzia eta agintaritzaren aurkako atentatua» egozten dizkiete.
«Kriminalizatzeko» asmoa
Global Sumud Euskal Herriarentzat Zupiria Palestinarekiko elkartasuna «kriminalizatzen» saiatzen ari da. Sailburuak Eusko Legebiltzarreko agerraldian adierazi zuen atxilotuetako bi pertsonak kartzela zigorrak bete zituztela ETAko kide izateagatik, eta haiek izan zirela «probokazio larrienak» eragin zituztenak. Global Sumud Euskal Herriak erantzun dio Palestinaren aldeko elkartasuna kriminalizatzen saiatzea «askatasun politikoen eta zibilen aurkako erasoa» dela: «Elkartasuna ez da delitua. Ekintzaile humanitarioei harrera egitea ere ez».
Ikusi gehiago
Zupiriak barkamena eskatu zuen eta gertatua «bene-benetan» sentitzen zuela esan zuen. Global Sumud Euskal Herriarentzat «aurpegia garbitzen» ari da. Ez du ulertzen benetan sentitzen badu zergatik egozten dien gertatutakoaren errua ekintzaileei eta haiek babestera joandakoei. Ez du ulertzen ertzainek zergatik jarri behar zuten segurtasun hesi bat «elkar besarkatu behar zuten senideen artean». «Zer segurtasun?», galdetu du Global Sumud Euskal Herriak.
Bi ongietorri
Gogoratu du larunbatekoaren aurretik beste bi ongietorri egin dizkietela beste flotilla batzuetako kideei, eta haietan ez dela inolako arazorik sortu. Larunbateko arazoak ertzainek sortu zituztela salatu du. Ertzainak iritsi ziren arte aireportuko joan-etorriak arazorik gabe egin zirela azaldu du.
Eusko Jaurlaritzako Segurtasun sailburuari esan dio Loiun gertatutakoa «auzi politikoa» dela. Ertzaintzari egotzi dio Israelekin elkarlanean aritzea eta Eusko Jaurlaritzari Israelekin «milioi askoko kontratuak» izatea. Global Sumud Euskal Herriarentzat Zupiriak «hipokrisia handia» erakutsi zuen, Palestinaren kontrako genozidioa gaitzesten duela esan zuelako, «Eusko Jaurlaritzak erakunde sionistarekin milioi askoko kontratuak dituen bitartean».
Ikusi gehiago
Zupiriak jakinarazi zuenez, zazpi ertzain zauritu ziren Loiuko aireportuan. Global Sumud Euskal Herria «harrituta» dago, «ertzainak izan zirelako gu jo gintuztenak». Gaitzetsi egin du ertzainak «biktima gisa» aurkezteko asmoa.
Global Sumud Euskal Herriak ez du onartuko flotillako kideen kontrako neurririk. Norbait epaitzekotan, Zupiria eta «jipoian parte hartu zuten ertzainak» epaitu behar direla uste du.
