URSSA eta EGA fabrikak hartu ditu Poliziak. 06:00ak aldera, abandonatutako bi fabrika horiek inguratu dituzte Ertzaintzaren, Espainiako Poliziaren eta Udaltzaingoaren dozenaka ibilgailuk, eta bertan bizi diren etxegabeak identifikatzen hasi dira poliziak. Operazioa ez da amaitu, eta segurtasun indarren presentzia nabarmena da oraindik ingurumarietan.
Erlazionatuta
Gasteizen aspaldian ikusitako polizia operaziorik handiena da bi eraikin okupatuetan egin duena, eta 70 agentetik gora —hala uniformedunak nola kaleko jantzitakoak— ari dira fabrikak miatzen, eta etxegabeak kanporatzen eta identifikatzen. Horietako batzuei pasaportea edo paperak eskatu diete datuak hartzeko, baina gero ez diete itzuli; horren ordez, zita eman diete Espainiako Poliziak Olagibel kalean duen komisariara bertaratu eta beren «egoera administratiboa» arautzeko. Hilaren 11rako eman diete hitzordua.
Dozenaka etxegabe identifikatu dituzte jada URSSA eta EGA fabriketan, ia denak gizonak. Banan-banan kendu dizkiete paperak, eta zita emanda, kalean utzi dituzte. Zenbait bizikleta, patin eta motxila ere kendu dizkiete bertan zirenei. Bestalde, Gizarte Zerbitzuetako langile batzuk kexu azaldu dira, poliziek ez dietelako utzi abandonatutako eraikinetara sartzen —bai, ordea, komunikabideei—.
Tentsio handiko egoera
Atzo, Gasteizko alkate Maider Etxebarriak esan zuen udala «justiziak erabakiko duenaren zain» zegoela, URSSA, EGA eta Fournier fabriketatik etxegabeak kanporatzeko. Egoerarekin «arduratuta» azaldu zen Etxebarria, azken bi asteetako gertakarien ostean: «Horregatik eskatu diegu Udaltzaingoari eta Ertzaintzari inguru horietan zaintza areagotzeko». Adierazpen horiek egin eta ordu gutxira hasi da gaur goizeko operazioa.
Maiatzaren 12tik 14ra bitartean «tentsio handiko» hainbat egoera izan ziren Errekaleor auzoan eta URSSA fabrikan bizi direnen artean. Errekaleor Bizirik elkarteak salatu duenez, lehenengo egunetan hainbat gazte saiatu ziren Errekaleorreko etxe batean sartzen, eta auzokideak egoera baretzen saiatu ziren, proiektuaren funtzionamendua azalduta.
Hala ere, maiatzaren 13ko arratsaldean, eta batez ere hurrengo goizaldean, egoerak okerrera egin zuen. Eragileen arabera, gaueko ordu txikietan 25 lagun inguruko talde bat iritsi zen auzora makilekin, burdinekin eta bestelako objektuekin, eta erasoak geldiarazten saiatu ziren bizilagunetako batek zauri larriak jasan zituen: burezurra eta besoa hautsi zizkioten, eta begi bateko ikusmena galdua du oraindik.
Errekaleor Bizirik elkartearen arabera, poliziak URSSA eta EGA fabrika abandonatuetan bizi diren etxegabeak «instrumentalizatu» zituen, haiek aitzakia hartuta auzoan esku hartze «neurrigabea» egiteko.
