Eusko Jaurlaritzako lehendakari Imanol Pradalesek gaur abiatu du alderdiekin eta eragile sozioekonomikoekin egitekoa duen bilera sorta, Miramarren urte politikoaren hasierako ekitaldian iragarri zuena. Ordezkari gutxien dituen taldearekin hasi du: Sumarrekin, kanpoan utzi baitu Vox oraingoan ere. Batzar horien helburua da «elkarrizketa sustatzea», eta «akordioak lortzeko beste espazio batzuk bilatzea». Baina ezkerreko koalizioak argi adierazi dio «tarte gutxi» ikusten duela horretarako.
Eguerdian jaso du lehendakariak Jon Hernandez Sumarrek Eusko Legebiltzarrean duen parlamentaria, eta modua izan du Ajuriaenera iritsi berritan jasotako erantzuna berresteko: Espainiako ezker konfederaleko koalizioa «gero eta urrunago» dagoela Jaurlaritzaren politiketatik. Hala aitortu du Hernandezek berak ere bilera ostean egindako agerraldian: «Gero eta distantzia handiagoa dago Eusko Jaurlaritzaren eta gure artean, eta oso tarte gutxi ikusten dugu akordioetarako».
Ezkor atera da bileratik Hernandez, nabarmendu baitu Jaurlaritzak akordioak eskatzen baditu ere, ez duela ahaleginik edo keinurik egiten oposizioa itun horietara batzeko: «Ez dute akordiorik bilatzen, atxikimenduak bilatzen dituzte. Oposizioak argazkian parte hartzea nahi dute, baina ez erabakietan», salatu du, eta gogorarazi gobernua bera izan dela «autosufizientzia» lehenetsi duena, alderdien esku utzi duelako Jaurlaritzari dagokion lana lege ekimenei dagokionez.
Sumarrek «noraezean» ikusten du jeltzaleen eta sozialisten koalizio gobernua, eta ohartarazi du «eskuinera lerratzen» ari dela, gero eta gehiago. Adibide gisa aipatu ditu, besteak beste, Jaurlaritzak Ceutako gertakariari buruz hartutako jarrera eta hiru aldundietan adostutako zerga aldaketak: «Errotzea, talentua edo lehiakortasuna bezalako hitzak erabiltzen ari dira kapitalari abantaila gehiago emateko».
Hori horrela, lema kolpea eman eta egoera iraultzeko proposamenak jarri dizkio mahai gainean. Ekonomiari dagokionez, bizitzaren kostuari aurre egitea eta soldatak areagotzea lehentasun gisa hartzeko eskatu dio. Eta etxebizitza politikei erreparatuz, berriz, «iragarkiak» egiteari utzi eta merkatuan esku hartzeko, etxebizitza hutsen nahitaezko alokairua aplikatuta.
Hernandezek ontzat jo du Jaurlaritzak medikuekin egindako akordioa, baina gainerako beharginekin ere ituna egiteko eskatu dio. Izan ere, Sumarreko bozeramaileak Pradalesi gogorarazi dio gobernuak badituela lan gatazka konpontzeko eskumenak, sailburuak ardura beti Madrilen teilatuan jarri izan badu ere.
Hitza bete ez izana
Estatutua eguneratzeko eztabaidari dagokionez, bestalde, Sumarreko ordezkariak lehendakariari aurpegiratu dio emandako hitza bete ez izana, gaiari buruz hitz egiteko alderdiekin bilera sorta bat iragarri arren ez duelako egin; ez ekainean, ez uztailean. Are, lehendakariari esan dio ez duela sinisten EAJ, EH Bildu eta PSE-EE ezer negoziatzen ari direnik.
Sumarreko bozeramaileak uste du hiru alderdiak negoziatzen ari direnaren plantak egiten ari direla, baina egiaz ez direla ezertaz hitz egiten ari. Horiek horrela, jakinarazi du autogobernu lantaldea martxan jartzeko eskaera eramango dutela Eusko Legebiltzarrera.
