Bi aktorek, Tamarak eta Marak, casting areto batean egingo dute topo. Biak daude krisi betean, eta iraganean bien artean gertatutako zerbaitek hankaz gora jarriko du lan prozesua. Aktore bakoitzaren desio, izu eta frustrazioak azaleratuko dira. Hori da Primeran plataformaren telesail berriaren abiapuntua, baina ez da drama bat. Ane Rotaetxe zuzendariak «komedia urbano disparatatu» gisa definitu du Tamara ta Mara. Hogei minutuko lau atalez osatua dago, eta Primeran doako plataformak bihar estreinatuko ditu guztiak, 22:00etan.
EITBren Formatu txikiak, talentu berriak deialdiaren barnean ekoitzitakoen artean estreinatuko duten bigarren telesaila da Tamara ta Mara; aurrenekoa Piztiak izan zen. «Deialdi horren berri izan genuenean, iruditu zitzaigun fikziora gerturatzeko aukera paregabea izan zitekeela», azaldu du Begira Produkzioak ekoiztetxeko ordezkari Rotaetxek. «Ekoiztetxean aspaldi heldu nahi genion fikzioari, eta lehen aldirako parada eskaintzen zigun Formatu txikiak, talentu berriak deialdiak». Duela urte batzuk, proiektu bat landu zuten Ainhoa Artetxe eta Ainhoa Etxebarria aktoreekin, eta hori bera berreskuratu zuten. «Aurreko proiektuak Ainhoa eta Ainhoa zuen izena, eta reality kutsua zuen. Hori izan da, edonola ere, Tamara ta Mara-ren hazia».
Etxebarria eta Artetxe aktoreek, Larraitz Zuazo gidoilariak eta Rotaetxek berak marraztu zituzten telesaileko lau atalen tramak. «Ondoren, Zuazo eta biok aritu gara idazketa lanean eta trama elkarrizketetara eramaten», dio Rotaetxek. «Eta Antton Telleriak eman zien bigarren buelta testuei, umorearen mesedetan». Telesailaren ekoizle nagusia Zuazo da.
Aktore taldean dira, besteak beste, Maria Urzelai, Koldo Olabarri eta Miren Gaztañaga. Lara Izagirre zinemagile eta ekoizlea ere ageri da, baita Lander Otaola eta Mikel Losada aktoreak ere.
Aurrekontu txikia, «erronka handia»
Telesailaren filmaketak hamar egunean egin zituzten. «Egun oso biziak izan ziren. Filmaketa hasi aurretik, sekulako aurreprodukzio lana egin genuen. Ez zegoen inprobisaziorako inolako aukerarik», ohartarazi du Rotaetxek. «Makillajea eta ile apainketa, jantzitegi proba luzeak, aktoreekin egin beharreko entseguak eta filmaketa plana oso ondo lantzea... Hori guztia hartu behar zen kontuan, eta Ane Intxausti zuzendari laguntzaileak gorriak pasatu zituen filmaketa plan errealista bat egiteko. Baina lortu zuen». Telesaileko zuzendariak gaineratu du aurreprodukzio lana ere «itzela» izan zela.
Aintzat hartu beharrekoa da EITBk diru gutxi ematen diela ekoiztetxeei Formatu txikiak, talentu berriak deialdian telesailak aurrera eramateko. «Aurrekontua txikia da, fikzio lana bera bezala. Erronka, aldiz, handia», dio Rotaetxek. «Hogei minutuko lau atal aurkeztu ditugu; aktore gutxirekin eta lokalizazio jakin batzuetan aritu gara, eta kanpoko eszenen filmaketak egun bakar batean egin genituen».
Istorioak baditu bere berezitasunak. Marak katalanezko esaldiak erabiltzen ditu tarteka. Tamara, berriz, haurrentzako Makusi plataformako izar bat da. Ataletako batean, EITBren aurkezpen jai bat ageri da. «Gidoian jai hori sartu genuenean, telebistako hainbat aurkezlek parte hartzea planteatu genuen». Hortaz, EITBko ikus-entzuleentzat ezagunak diren aurkezleak ageri dira jaian: Felix Linares, Ana Goitia, Xabier Madariaga, Malen Altuna, Aitziber Grados...
Tamara ta Mara telesailaren aurkezpen berezia egingo dute bihar, Bilbon. Han izango da lantalde osoa. Baita Rotaetxe ere: «Urduritasun puntu bat dugu. Baina urduritasun goxoa da. Lana eginda dago, eta, orain, erakusteko garaia iritsi da». Golem zinema aretoetan egingo dute jendaurreko aurrestreinaldia, bihar, 18:00etan.
Nahiz eta Begira Produkzioak ekoiztetxearen lehen fikzio lana izan, etorkizunean halako gehiago egin ahalko dituztela espero du Rotaetxek: «Esperientzia oso interesgarria iruditu zaigu. Irakaspen handia izan da, eta beste tamaina bateko proiektuetarako entrenamendu ezin hobea». Tamara ta Mara-ren zuzendariak iragarri du «erronkei heltzeko prest» daudela. «Badugu beste fikzio bat garapen fasean, Katixa Agirreren eta Harkaitz Canoren gidoiak dituena».
Udaren ostean, Primeran plataformak Formatu txikiak, talentu berriak deialdiko telesail hauek estreinatuko ditu, nahiz eta estreinaldi egunak ez dituen zehaztu: AIRBNBarik (Alba Lozano eta Nitya Lopez), Estu (Arriguriko Xabier Ojinaga eta Ander Mateos), Izaki pixkat gardenak (Iñigo Sbeltza), Lehen aldiz (Jone Arriola) eta Amarekin goxo-goxo (Ana Nafarrate eta Lander Otaola). Guztien udaberri honetan filmatu dituzte.
Gaubera, espero da EITBk Odol ilargia telesaila (David R. Losada eta Mikel Alvarez) eta Anjel Alkainen fikziozko lan berria estreinatzea udazkenean.
