Ehunka lagun elkartu dira gaur arratsaldean Donostiako Parte Zaharrean, KAS Kaleko Afari Solidarioak egitasmoak egindako deiari erantzunez. Erosketa orgak eskuan, kalerik kale aritu dira pasieran, protesta gisara, salatzeko Donostiako Udaltzaingoa jazartzen ari zaiela herritarrei, kalean bizi direnei borondatez janaria emateagatik.
Izan ere, asteon jakinarazi dutenez, udaltzainek hainbat lagun identifikatu dituzte kalean, eta erosketa orgak arakatu dizkiete, ogitartekoak banatzera zihoazela. Kasurako, joan den ostiralean lau pertsona identifikatu zituzten beren ikasleei jana eskaintzeagatik. Egoera «zentzugabea» da KASen arabera, eta gero eta zailagoa da udalaren jarrera ulertzea. «Erosketa orgatxo bat eramateak susmagarri egiten zaitu», gaitzetsi zuten.
Hori dela eta, identifikatutako boluntarioei elkartasuna adierazteaz gain, mezu argia zabaldu nahi izan dute gaur, erosketa orgak altxatuta: ogitartekoak banatzea ez da delitua, ez eta inori jazartzeko arrazoia ere. Hain justu ere, Plaza Berrian eserialdia eginez eta ogitartekoak janez amaitu dute mobilizazioa. Gainera, ohartarazi dute ez dutela amore emango eta afariak banatzen jarraituko dutela.
