GOE Gastronomy Open Ecosystem zentroa du hizpide Berriketan saioaren atal honek. Basque Culinary Centerren berrikuntza eta ikerketa zentro berria ireki dute Donostiako Gros auzoan, eta zenbait herri mugimendu aurka agertu dira. Zentroa bertatik bertara ezagutu du Enekoitz Telleria Sarriegi BERRIAko Bizigiro saileko kazetariak, eta gai horri buruzko xehetasunak azaldu dizkigu.

Ablitasko aerodromoa du hizpide Berriketan saioaren atal honek. Espainiako armadak Bardeako tiro eremua eta hain ezaguna ez den Ablitasko aerodromoak baliatzen ditu armak eta hegazkinak probatzeko. Bardea Libre taldeak eztabaida piztu nahi du, azpiegitura horien kontrako argudioak berriz ere mahaigaineratzeko. Ablitasko aerodromoari buruzko xehetasunak azaldu dizkigu Edurne Elizondo Nafarroako Hitzako koordinatzaileak.

Netflix plataforma du hizpide Berriketan saioaren atal honek. Gaur hamar urte dira Netflix Hego Euskal Herrira iritsi zela; urte bat lehenago iritsi zen Ipar Euskal Herrira. Hamarkada honetan erabat aldatu da ikus-entzunezkoak kontsumitzeko manera. Urtzi Urkizu BERRIAko komunikazio gaietako kazetariak Netflixen historiaz eta streaming plataformen eraginaz hitz egin digu.

Euskararen arnasguneak ditu hizpide Berriketan saioaren atal honek. Abian da Arnasguneak hizkuntza gutxituen biziberritzean deitutako nazioarteko konferentzia, Azpeitian (Gipuzkoa). Han hitz egiten ari direnez eta arnasguneei buruzko gako nagusiez mintzatu zaigu Asier Basurto Arruti Soziolinguistika Klusterreko ikerlaria.

Uraren zaporea du hizpide Berriketan saioaren atal honek. Badu zaporerik urak? Eta hala baldin bada, zeren zaporea du? Zientzialariek horri buruz ikertu dutena azaldu digu Itsaso Jauregi BERRIAko zientzia gaietako kazetariak.

Palestinaren aldeko lanuztea du hizpide Berriketan saioaren atal honek. Hego Euskal Herrian hiru eta lau orduko lanuzteak deitu dituzte sindikatu gehienek, eta hezkuntzan egun osokoa izanen da. BERRIA taldeko langileok bat egin dugu lanuztearekin, eta atal honetan gure arrazoiak azaldu ditugu. Horretarako Alazne Iruretagoiena eta Uxue Rey lankideek lanuzteaz hitz egin digute.

Martxelo Otamendi. Handira jotzeko kazetaritza liburua du hizpide BERRIKETAN saioaren atal honek. Garbiñe Ubeda BERRIAko kazetariak idatzi du Otamendiren ibilbideari errepasoa ematen dion elkarrizketa liburu hori, eta gaur aurkeztuko dute. Lan horren nondik norakoak azaldu dizkigu Ubedak berak.

Liburua Elkar argitaletxeak, Jakin aldizkariak eta BERRIA egunkariak argitaratu dute, kazetaritzako lan luzeak biltzen dituen Aleka bildumaren barrenean. Aurkezpenak eginen dituzte Tolosan (urriak 14), Baionan (urriak 16), Iruñean (urriak 29), Bilbon (azaroak 24) eta Gasteizen (azaroak 27).

IBMren ordenagailu kuantikoa du hizpide Berriketan saioaren atal honek. Asteartean inauguratuko dute System Two ordenagailua Donostiako Ibaeta auzoan, Ikerbasqueren zentroan. Irune Lasa BERRIAko kazetaria New Yorken egon zen antzeko ordenagailu kuantiko bat bertatik bertara ezagutzen, eta berak azaldu dizkigu gai horri buruz jakin beharrekoak.

Bernedoko euskal udalekuen auzia du hizpide Berriketan saioaren atal honek. Zenbait familiek han gertatutakoei buruz egindako salaketak lehenik, eta hezitzaileen kontra zabaldutako mezuek ondoren, polemika bizia piztu dute. Eztabaidaren zentroan batez ere dutxa mistoak eta biluztasuna egon direnez, sexu hezkuntzaz hitz egitea erabaki dugu, Maite Asensio Lozano BERRIAko feminismo gaien arduradunarekin.

Harrera ekintzaileen kontrako auzi saioa du hizpide Berriketan saioaren atal honek. 2024ko Korrikan antolatutako taldean 36 migratzaileri muga zeharkatzen laguntzea egotzita epaitu dituzte zazpi ekintzaile. Epaiketa Baionan izan da, eta saioa auzi politikoa salatzeko baliatu dute ekintzaileek. Epaiketaren berri eman digu Leire Casamajou Elkegarai kazetariak, BERRIAk Baionan duen egoitzan aritzen dena.