Aurreko astea eroa izan da. Hegaldia hartu eta Euskal Herriratu naiz. Siri Hustvedtekin elkarrizketa Bilboko Euskaldunan, Xabier Leteren ingelesezko itzulpenaren aurkezpena Donostian, Bitartean heldu eskutik poema-liburuaren 25. urteurreneko emanaldiaren iragarpena Arriagan eta, bukatzeko, Bilboko Arte Ederren Museoaren inaugurazioa atzo.

Fosterren txapelak museoa bildu egin du. Dena da eskuragarriago, eta berez ona zen bildumari ikusgarritasun handiagoa eman dio. Mende askotako artea biltzen duen museoa da, egile klasiko handiekin eta, berezi egiten duten, euskal artistekin. Azpimarratzekoa da emakume artisten presentzia handitzeko egin den ahalegina.

Museoa beti izan da inspirazio-iturri niretzat. Bilbao-New York-Bilbao-n Artetaren Erromerian lana da eleberriko ildoetako bat. Elkarrekin esnatzeko ordua-n, berriz, Gezala da protagonista. Gezalak gela propioa du orain museoan, Sonia eta Robert Delaunayrekin elkarrizketan.

Erromerian gordeta egongo zela uste nuen, baina ezustean aurkitu nuen eraikin berrian, diseinuari eskainitako gelan.

Segituan joan nintzen amonaren bila.

Nobelan asmatu egin nuen Artetak nire amona margotu zuela. Hantxe zegoen ustezko amama, inoiz baino irribarretsuago, ni ikusteaz poztuko balitz bezala.

Gaur New Yorkera itzuliko naiz. Sei orduko aldea dagoenez eta egunaren alde egingo dudanez hegan, 30 orduko eguna izango da gaurkoa.

Nire urtebetetzea, hain zuzen.

Agirre lehendakariaren figura du hizpide Berriketan saioaren atal honek. Azken hilabeteotan Jose Antonio Agirreren legatua goratu dute EHBilduko eta EAJko politikariek, eta ika-mika ere izan dute, jeltzaleek beretzat duten erreferentziazko figura EHBilduk aldarrikatu duelako. Gauza batean ados jarri dira: Loiuko aireportuari 'Agirre lehendakaria' izena paratzea adostu dute. Aitor Biain BERRIAko Politika saileko kazetariak tirabira honen inguruko xehetasunak eman dizkigu.

Babacar Welleren hilketa du hizpide Berriketan saioaren atal honek. Irailaren 28an hiru tiro egin zizkion udaltzain batek Hondarribian (Gipuzkoa), eta justizia eske karrikara atera da senegaldar komunitatea. Hondarribian gertatutakoa kontatu digu Isabel Jaurena BERRIAko Gizarte saileko koordinatzaileak, eta hilketa horren testuingurua azaldu digu Mikel Henda Gomez de Segura afroeuskalherritar, filosofo eta aktibista antirrazistak.

Udan zein udazken hasiera honetan plazaraturiko hainbat kantu berri enztungo ditugu MurMur-en. Honako musikari eta taldeen piezak enztungo ditugu, euren murmurio eta oihartzun: AimarZ eta Kiliki; Xarma Leone, Mentza, Ezezez, Zea Mays, Izaro, Amorante, Izaki Gardenak eta M. Lecrêpe.

Etxebizitzaren auzia du hizpide Berriketan saioaren atal honek. Espainiako Gobernuak bi dekretu onartu ditu, eta ostiralean ikusiko da Diputatuen Kongresuak babesten ote dituen. Etxebizitzaren krisiari aurre egiteko neurri sorta bat da, eta litekeena da maizterren alokairu kontratuak automatikoki berritzeko aukera bertan behera gelditzea EAJ eta Junts alderdiak «etxejabe txikiak babesteko» asmoa agertu baitute. Paulo Ostolaza BERRIAko etxebizitza gaietako kazetariak azaldu digu dekretuetan jaso dutena, baita Erandion, Donostian eta Iruñean inbertsio funtsen mesedetan etxebizitza gal dezaketen 1.100 familia baino gehiagoren egoera ere.

 

Nazio Batuen Erakundea du hizpide Berriketan saioaren atal honek. Irailaren 22tik 28ra iragan da NBEko Batzar Nagusiko eztabaida orokorra, eta diskurtso belizistak zein mehatxuak nagusitu dira oholtza gainean. Nazio Batuen Erakundearen helburuez, ezinez, gaur egungo egoeraz eta eztabaida orokorrak eman duenaz hitz egin digu Arantxa Elizegi Egilegor BERRIAko editoreak.