Aranzadi zientzia elkarteak aurkikuntza esanguratsu bat egin du San Adriango kobako aurtengo indusketan, Gipuzkoa eta Araba arteko pasabidean, Aratz-Aizkorri mendilerroan: harrizko tresna batzuk eta gizakiek erabilitako animalia hezurrak.

Berezia da haien jatorria: neandertalenak dira, duela 40.000 urtekoak gutxienez.

Berrogeialdian Tiktok plataforman bideoak jartzen hasi zen Iker Alvarez (Anoeta, Gipuzkoa, 2003), eta, orduz geroztik, ez da gelditu. Modari buruzko bideoak egiten ditu, zapatilei eta arropari buruzkoak, eta, gaur-gaurkoz, bizitzeko adina diru lortzen du sare sozialetatik. Erdaraz aritzen da.

Generoak matematika ikasgeletan zer forma hartzen dituen aztertu du Uzuri Albizu Malleak (Munitibar, Bizkaia, 1989) Matematika, hezkuntza eta generoa gurutzatzen diren lekuak bere doktore tesian. Azaldu duenez, neskak 6 urterekin hasten dira beren adimen gaitasuna gutxiesten: «Ikasia da».

Euskal Herriko Eskolarteko Bertso Txapelketa irabazi du bigarren aldikoz Aizpurua Ibargaraik (Sara, 2006). Aste bat lehenago, Ipar Euskal Herrikoa irabazi zuen. Heldu den urtekoa azken eskolartekoa izanen du, 18 urtera heltzearekin. Baionako Bernat Etxepare lizeoan da ikasle, eta eskubaloian ari da Hendaian.

Zer behar dute gazteek? Euskaratik ditugun erronkak aletzen jardunaldiak egin dituzte, Euskalgintzaren Kontseiluak antolatuta. Gazteei hitza emateko baliatu nahi izan zituzten, bereziki.

Han jasotakoak buruan bor-bor ditu oraindik Kontseiluko proiektuburu Amets Arangurenek (Iruñea, 1998): besteak beste, euskara gaitasun nahikoa duten irakasleak behar direla, hezkuntzan euskara izan gabe ezin dela euskaldundu, eta euskarazko edukirik ez dagoela ikus-entzunezkoetan.

Ez da ohikoa futbolari batek 27 urterekin erretiroa hartzea. Hala hartu du Realeko jokalari Iraia Iparragirrek (Lasarte-Oria, Gipuzkoa, 1995). «Nire gorputzari eta buruari entzun, eta atzetik datozenei lekua egiteko garaia dela sentitu dut».

Emakumeen futbolaren garapenaren lekuko eta protagonista izan da, baina uste du oraindik bide luzea geratzen dela.

Itzuli dira enarak eta sorbeltzak Euskal Herrira. Ohiko hegaldi akrobatikoak egiten ari dira eraikinen eta baserrien inguruan. Habien errolda egingo du Aranzadik, umatze garaian habiak aurkitzeko eta urtez urteko jarraipena egiteko. Datuak Ornitho.eus zientzia atarian bilduko dituzte.

Gurpil aulkiko saskibaloia ezagutu orduko maitemindu zen harekin Adrian Garcia (Gasteiz, 2002). Gaixotasun degeneratibo baten ondorioz, ezin da lehiatu zutik dabiltzanekin batera, eta Bilboko Bidaideak taldeko jokalaria da.

Eurocup-1-en txapeldunorde, Kopan txapeldun, eta Ligan hirugarren izan dira aurtengo denboraldian.

Hiketan mintzo da Oiartzun (Leitza, Nafarroa, 1966), 'Hika eta toka. Noka ere toka!' liburuaren egilea. Hamabost-hogei lagunen testigantzak bildu ditu liburuan, eta, hitanoz, garai bateko bizimoduaren berri eman diote.

Leitzako mintzamoldea jaso du berak, baina herri guztietarako balio dute hitanoaren gaitzek, eta konponbideak: «Belaunaldien arteko elkarlana».