Gazako zerrendako setioa du hizpide Berriketan saioaren atal honek. Israelek urte bete darama Gazako zerrendari eraso egiten, eta orain arte gertatutakoaren errepasoa egin dugu. Gatazkaren egoeraz eta nazioarteko eragileen jarrerez aritu gara Maddi Iztueta Olano BERRIAko Mundua saileko kazetariarekin.

Goenkale folletoia du hizpide Berriketan saioaren atal honek. Duela 30 urte eman zen lehenbizikoz, eta 22 denboraldi izan zituen. Goenkalek euskarari egindako ekarpena eta euskal herritarrengan izan zuen eragina azaldu digu Urtzi Urkizu BERRIAko komunikazio ataleko kazetariak.

Osasun etxeetako mediku falta du hizpide Berriketan saioaren atal honek. Herri askotan herritarrek mobilizazioak antolatu dituzte arazoa salatzeko. Olatz Silva Rodrigo eta Iñaki Rubio Mendoza BERRIAko kazetariek azaldu digute egoera zein den.

Bakterio erresistenteak ditu hizpide Berriketan saioaren atal honek. Gero eta bakterio gehiago erresistenteak zaizkie antibiotikoei, eta gero eta antibiotiko eraginkor gutxiago ditugu. Gaiaren gako nagusiak azaldu dizkigu Irene Barañano Diaz BERRIAko kazetariak.

Emakume musikarien diskriminazioa du hizpide Berriketan saioaren atal honek. Gatibu taldeko Alex Sarduiren hitzei erantzun diete Euskal Herriko 150 emakume musikari baino gehiagok, diskriminaziorik ez dela izan esan eta gero. Musikaren munduan dagoen matxismoa eta emakume musikariek bizi duten egoera azaldu digu Uxue Rey Gorraiz BERRIAko kultur kazetari eta Berria FM podcast saioko aurkezleak.

Moussa Diagne kanporatze agindua jaso duen gaztearen egoera du hizpide Berriketan saioaren atal honek. Karrikan imitaziozko jantziak saltzeagatik salatu dute, eta kanporatze aginduaren mamuarekin bizi da orduz geroztik. Auziaren gako nagusiak azaldu dizkigu Isa Egiguren kazetariak, eta Diagnek bere bizipenak kontatu dizkigu.

Israelek Hezbollahren aurka egindako erasoa du hizpide Berriketan saioaren atal honek. Pertsona-bilagailuak eta walkie-talkieak leherrarazi zituen Israelek joan den astean, eta Asier Garaialde Izarkom telekomunikazio kooperatibako arlo teknikoko zuzendariak eman dizkigu atentatuaren alor teknikoari buruzko gakoak. Hezbollah eta Israelen arteko gatazkaren testuingurua Mikel Garcia Martikorena BERRIAko Mundua saileko kazetariak eman digu.

Eskoziako independentzia erreferenduma du hizpide Berriketan saioaren atal honek. Duela hamar urte egin zen, 2014ko irailaren 18an. Erreferendumak Eskozian izandako eragina eta ordutik independentziaren aldeko jarrerak izandako bilakaera aztertu dugu Jon Olano Urain BERRIA egunkariko editorearekin batera.

Udako gertakari nagusien errepasoa da Berriketan saioaren atal hau: Parisko Olinpiar Jokoak, bestetako sexu erasoak, Osakidetza, eta nazioarteko gatazkak, protestak eta hauteskundeak, besteak beste. Izan ere, udako gertakari horietako askok segida izanen dute hurrengo hilabeteetan, eta haien inguruan arituko gara hurrengo ataletan.

Pinkwashing edo zuriketa arrosa du hizpide Berriketan saioaren atal honek. Gaur, ekainak 28, LGTBIQ+ Harrotasun Eguna, sexu eta genero disidenteen borroka eguna da, baina badira aldarri horiek haien jarduera zuritzeko, negozioa egiteko edo haien estatuak eta sarraskiak legitimatzeko baliatzen dutenak. Gabri Lopez Bilboko EHGAM elkarteko kideak Bilbao Bizkaia Harro egitasmoaz hitz egin digu, eta Reem Dandan Sare Lesbianistako queer aktibista palestinarrak Israelen zuriketa arrosa azaldu digu.