Ekotopaketei buruzko saioarekin hasi du ibilbidea naturari eta klimari buruzko 'Kinka' podcastak

  • 93 hitz
  • Albistea entzun
00:00 /

‘Azken krisia, gure garaia' lelopean, Ekotopaketak izan dira Portugaleten (Bizkaia). Eta topaketa horiei buruzko saioarekin ekin dio BERRIAren ‘Kinka’ podcastak bere ibilbideari. Astearteetan argitaratuko da, hamabostean behin. Saio bakoitzean gai bati erreparatuko diote, erreportaje edo elkarrizketa baten bidez, eta askotariko gaiak jorratuko dituzte.

Mundu osoko krisi ekologiko eta sozialaren aurrean euskal ekologismoak hartu beharreko norabideez jardun dute Ekotopaketak jardunaldietan, eta Kinka-k bertan parte hartu duten hainbat aditu elkarrizketatu ditu lehen saioan. 

Izan ere,  ingurumena kinka estuan dago, eta 2022ko albisteek erakutsi dute bizkortzen ari dela krisi hori, eta handitzen ari dela gai horiei buruzko kezka. «Nora doa mundua?», galdera zabalduz doa, eta kezka horri heldu nahi dio BERRIAk, Kinka proiektu berriarekin. Klima eta natura krisian lelopean, podcast bat eta albiste buletin bat zabalduko ditu hemendik aurrera, gai horiei buruzko informazioa eta baliabideak emateko irakurleei eta entzuleei.